بقالى كتير ما حطتش بوست عدل مفيش غير تاج وتهنئة وجاى بعدها اتنين كمان علشان اعياد ميلاد حبايبي كلهم برج العقرب
-----------------------------
-----------------------------
مترو الادغال او ما يطلق عليه جدلا فى بلدنا مترو الانفاقفى المترو بشوف العجب العجاب بجد فى مواقف كتير حصلت بس هحكى عن موقفين كدا اللى فاكرهم دلوقتى
الاول بيتعلق بحاجة من ارخم حاجة بشوفها بتحصل فى المترو وهى ان واحد ما يقطعش تذكرة ويجي ورا واحد ويدخل معاه انا حصلت معايا الحكاية دى كام مرة قلت والله ما بدهاش ومش هسمح بكدا تاني المهم اول مرة اعمل كدا كنت بركب من الملك الصالح المهم وانا داخل واحد حط ايده يحجز الماكينة قبل ما تكمل دورتها علشان يدخل يعني انا روحت ملتفت وعملت فيها عبد الناصر فى زمانه وقلتله اسف لو سمحت اوعى ايدك الراجل اتخض وبصلي بطريقة كدا ساخرة وراح مطلع اشتراك مترو وضحك انا بقي قفلت معايا قلتله دا شيء متعلق بيا وانا مش بسمح لحد يديني على قفايا ويعدي معايا قالى خلاص ، مرة تانية بقي فى رمسيس واحد حب يعمل نفس الحكاية بس انا برجلي ورحت دايس على الحته اللى بنعدي منها والراجل بيحاول يحجزها بأيده بس انا ضغت عليها جامد لقدام راحت مكملة الدورة التفت للراجل وانا الصراحة شمتان فيه علشان ما خليتهوش يعدي معايا لقيته بيبصلي وكأنه هياكلنى بس كنت فرحان قوى وكأنى فتحت عكا ... الاغرب انى بلاقي الواحد من دول واقف ومستنى الفرصة المناسبة علشان ينقض ويدخل مع واحد تانى بس الحمد لله انا بقيت ارخم على اى حد يعمل كدا وما برضاش ابدا ............ دول بس حكايتين من حكاوى كتير ليا فى دنيا المترو لما افتكر ابقي احكيلكوا ......
الاول بيتعلق بحاجة من ارخم حاجة بشوفها بتحصل فى المترو وهى ان واحد ما يقطعش تذكرة ويجي ورا واحد ويدخل معاه انا حصلت معايا الحكاية دى كام مرة قلت والله ما بدهاش ومش هسمح بكدا تاني المهم اول مرة اعمل كدا كنت بركب من الملك الصالح المهم وانا داخل واحد حط ايده يحجز الماكينة قبل ما تكمل دورتها علشان يدخل يعني انا روحت ملتفت وعملت فيها عبد الناصر فى زمانه وقلتله اسف لو سمحت اوعى ايدك الراجل اتخض وبصلي بطريقة كدا ساخرة وراح مطلع اشتراك مترو وضحك انا بقي قفلت معايا قلتله دا شيء متعلق بيا وانا مش بسمح لحد يديني على قفايا ويعدي معايا قالى خلاص ، مرة تانية بقي فى رمسيس واحد حب يعمل نفس الحكاية بس انا برجلي ورحت دايس على الحته اللى بنعدي منها والراجل بيحاول يحجزها بأيده بس انا ضغت عليها جامد لقدام راحت مكملة الدورة التفت للراجل وانا الصراحة شمتان فيه علشان ما خليتهوش يعدي معايا لقيته بيبصلي وكأنه هياكلنى بس كنت فرحان قوى وكأنى فتحت عكا ... الاغرب انى بلاقي الواحد من دول واقف ومستنى الفرصة المناسبة علشان ينقض ويدخل مع واحد تانى بس الحمد لله انا بقيت ارخم على اى حد يعمل كدا وما برضاش ابدا ............ دول بس حكايتين من حكاوى كتير ليا فى دنيا المترو لما افتكر ابقي احكيلكوا ......
تشي
10 comments:
انا الاول مش عارفة ليه كنت حاسة الموضوع جنتله ،واحدة تقوللى "ممكن اعدى وراكى" ، امسكلها المكنة واقولها اتفضلى.. مش عارفة كنت بفكر ازاى ساعتها، بس دلوقتى الموضوع بقى يحسسنى بالتخلف
المهم ان الناس فاكرة الحكاية شطارة وفهلاوة وهى فى الحقيقة سرقة جنيـــــــــــه مصــــــــــــرى كامل ، وبما ان المترو "ملك الشعب" ، يعنى اللى بيعدى كده سرق م الشعب جنيه مايعادل سدس دولار امريكى...وده بياثر على اقتصاد الوطن
انا مش بتهكم والله ، بتكلم جد..حد يقدر يحط ايده ف جيب اللى جنبه وياخد منه جنيه ، او ياخد من محل كيسين شيبسى من ورا البياع وميدفعش تمنهم ... لا طبعا ، مع انها فى الاخر بردو جنيه بس ..بردو السرقة سرقة
الواحد مش عارف يعمل ايه ف البلد الغريبة اللى كله بيسرق كله فيها دى
تحياتى
انا والله بيصعبوا عليا
انت متعرفش ظروف الناس
افرض معهاش جنيه عشان التذكرة
او ماشى معاها جنيه بس هى فلوسها قليلة ومحتاجة توفره لحاجة تانية
الناس غلابة يا تشى
انا كنت فاكر اني رديت هخنا قبل كده
ما علينا نرد تاني
قاعده عامه من خبتي في المترو ( خبره 7 سنين متتاليه ) و تخاطيف اد 6 قبليهم )
99.99 % من اللي بيعدو وراك اشتراكات بس بتبوظ و كمان هديك سر بنيته على دراسه علميه حوالي 3 سنين عن ايه اللي بيبوظ تذكره الاشتراك.
في نوعين من المكن اللي بيخش فيه التذكره على الخط الاول
النوع الاول السهم فيه واخد زاويه و لونه برتقالي و ده هتلاقه في كل محطات الانفاق و المحطات اللي فوق هتلاقيه ماكينه واحده على جنب النوع ده مبيبوظش التذكره بتاعه الاشتراك النوع التاني السهم افقي و اصفر ده لو دخلت تذكره الاشتراك يبقى نقرى الفاتحه على روحها
انا زمان لما تذكرتي كانت تبوظ كنت بنط لما اكتشفت ان النط ممنوع و اتخانقت يجي 3 اربع خناقات بقيت اما استأذن من اللي واقف في المترو انيب انط او يفتحلي مكنه او استأذن من حد اعدي وراه
صح بتحصل
وفعلا الناس غلابة
اساسا مصر من غير مترو متبقاش مصر..زى الاهرامات كده..وكمان متنسوش انه انجاز مبارك الوحيد لازم نرفع معنويات الراجل ..
بس بعيد عن التذاكر والنط الواحد ممكن يألف رواية اد رواية الحرب والسلم عن مواقفه فى المترو
اصل المترو ده بيقوم بوظيفة سوق حر و مطعم و مكتبة وجمعية خيرية ونادى فى نفس الوقت غير انه وسيلة مواصلات
عربية السيدات مثلا بيعدى فيها بياعين هدوم و مستلزمات بيت و مجلات ومكياج ..وطبيعى جدا انك تلاقى ف الركن بنتين تلاتة قاعدين فى الارض بياكلوا كشرى مثلا..وناس مثقفة معاها كتب بتقرا او بتذاكر او مثلا بتحل شيتات (زى مابعمل بالظبط)... غير بقى المتسولين اللى رايحين جايين .. اكتر حاجة ممكن تستفزنى لما تكون عربية السيدات زحمة لدرجة انى مش بعرف احرك صوابعى.. والاقى واحد ورايا بيقول "ساعدونى ربنا يكرمكو ويستركو...سسسسس وسعى عشان اعدى ياابلة ... " مش بستوعب ساعتها الناس توسع فين
لا وفى ظاهرة غريبة، ان كل الاطفال المتسولين فى المترو اسمهم (حسام) ، يجي خمس اطفال غير بعض بيطلعوا المترو ويوزعوا ورق مكتوب فيه "اسمى حســام ، مات ابى ..الخ"..
فعلا مصر هى المترو .. عشان كده بحب المترو مووووت:))
أنا فين من زمان معلش بقي يا جماعة بقالى خمس ايام الكومبيوتر بتاعى مفيهوش روح قصدي مفيهوش نت
دروب او ذا اوشن
وانتى بتقولي جنتلة وبتمسكي المكنة بتحسسيني كأنك بتفتحيلها باب الجاجوار ولا حاجة
سدس دولار امريكي طيب وليه الاحراج بس وكمان هو فين اقتصاد الوطن دا اصلا مش مهم كله بيسرق فى كله
سيمبل جيرل
مش عارف ليه مش شايف ان دا مبرر اصلا الغاية مش بتبرر الوسيلة وبالذات فى المواقف دي اللى بتكون فيها الوسيلة طريقة زى كدا
محمد باشا
وماله رد مرة واتنين دا احنا يشرفنا ردك
طبعا نظرا لخبرتك الكبيرة اللى بتتضائل قصادها خبرتى " خمس سنين بس " طبعا انت اصدق منى ومن بلوجى هذا بأنصح الناس كلها تحافظ على اشتراكتها علشان ربنا ما يوقعهاش فى واحد رخم زيي ويتبعوا تعليمات الاسهم اللى محمد قال عليها
دروب او ذا اوشن
ايه دا مترو ايه واهرامات ايه دا الشعب المصري اللى شاف المترو اكتر من اللى شاف الاهرامات اصلا وربنا يباركلنا فى الراجل وكفاية عليه الانجاز دا ومتشكرين على كدا وشكرا بقي
بس فعلا المترو فيه الحاجات دي بس بطريقة تضايق وأرخم حاجة بقي لما تبقي قاعد معاك جورنال ولا مجلة ولا كتاب وتلاقي اتنين حواليك هياكلوا الكتاب وانت مش عارف تقرى والله مرة واحد قالى ممكن تقطع الجورنال بس ونقراه ونبي نبدل لما كل واحد يخلص الحته اللى معاه ساعتها اديتلوا الجورنال وقلتله اناهقراه لما حضرتك تخلصه
وعجبي
تشي
آه إنت من رواد المترو برضه؟
شكلك ركيب قديم
أنا برضه كان نفسي يحصل معايا الموضوع ده وأصد الناس لكن مش بلحق والصراحة مش بيجيلي قلب أصلاً
مع أطيب تمنياتي إني أقدر بعد كدة أو مرة تيجي فيك بقى
تحياتي
إضافة بس
simple girl
إنتي بتقولي لتشي إن الناس غلابة؟؟
المفروض إن تشي ده أعرف واحد بالناس الغلابة دول .. ولا إيه يا عمنا؟
تحياتي
الاستاذ
طبعا من رواد المترو وقديم اه
بس انا هقولك على حاجة صحيح التشي كان الناس الغلابة هما حياته وعايش علشانهم لكن مش لدرجة السرقة مش بيقولوا برضه الحق اولى ان يتبع والسرقة سرقة
يعني ترضي على رأي "دروب اوف ذا اوشن " واحد من الغلابة يمد ايده فى جيبك وياخد منك جنيه ونقول غلابه
ايه كلامك
تشي
تصدق ده دايما بيحصل معايا و خصوصا خصوصا في محطة المعادي
تقريبا نص المعادي بتركب سفلقة
بس ان واحد يمسك المكنة عشان يعدي دي حاجة و انك تلاقي واحد قام مطبق نظرية التحام قوى الشعب دي حاجة تانية خالص...و خصوصا الستات..بما اننا ستات او بنات زي بعض تلاقي واحدة قامت هوب وراك و مش مدياك اي مساحة انك تهرب منها او تزوغ و هتعدي هتعدي...المنظر بيكون اصلا مش لطيف...بس دايما الحجة واحدة..اصل التذكرة بتزمر
و انا مالي تزمر و لا تطبل حتى...انا في مرة تذكرة الاشتراك بتاعتي كانت بايظة و الله اتكسفت اعدي ورا حد و ملقتش برده عسكري و لا حد يعديني رحت اشتريت تذكرة و احترمت نفسي
اصلها مجتش على الجنيه يعني اللي هنبهدل نفسنا عشانه
Post a Comment