كل سنة وكيكوووووووووو طيب

KiKoOoOoOoOoOoOoOoO

المهندس المطحون فى الكلية الخارقة وحبيب قلبي كيكو
بتاع الواحدات :P
1/11
يوم واحد نوفمبر عيد ميلاده وطبعا كان لازم اهنيه واكون قبل الكل
كيكو
كل سنة وانت طيب وبألف خير
وعلى طول مع بعض ;)
وعقبال اتناشر الف سنة :P

ويا رب على طول سعيد

الهدية علشان ميبقاش ليك عندي حاجة تانى :P

تشي السعيد

مترو الأدغال

بقالى كتير ما حطتش بوست عدل مفيش غير تاج وتهنئة وجاى بعدها اتنين كمان علشان اعياد ميلاد حبايبي كلهم برج العقرب
-----------------------------

مترو الادغال او ما يطلق عليه جدلا فى بلدنا مترو الانفاق

فى المترو بشوف العجب العجاب بجد فى مواقف كتير حصلت بس هحكى عن موقفين كدا اللى فاكرهم دلوقتى
الاول بيتعلق بحاجة من ارخم حاجة بشوفها بتحصل فى المترو وهى ان واحد ما يقطعش تذكرة ويجي ورا واحد ويدخل معاه انا حصلت معايا الحكاية دى كام مرة قلت والله ما بدهاش ومش هسمح بكدا تاني المهم اول مرة اعمل كدا كنت بركب من الملك الصالح المهم وانا داخل واحد حط ايده يحجز الماكينة قبل ما تكمل دورتها علشان يدخل يعني انا روحت ملتفت وعملت فيها عبد الناصر فى زمانه وقلتله اسف لو سمحت اوعى ايدك الراجل اتخض وبصلي بطريقة كدا ساخرة وراح مطلع اشتراك مترو وضحك انا بقي قفلت معايا قلتله دا شيء متعلق بيا وانا مش بسمح لحد يديني على قفايا ويعدي معايا قالى خلاص ، مرة تانية بقي فى رمسيس واحد حب يعمل نفس الحكاية بس انا برجلي ورحت دايس على الحته اللى بنعدي منها والراجل بيحاول يحجزها بأيده بس انا ضغت عليها جامد لقدام راحت مكملة الدورة التفت للراجل وانا الصراحة شمتان فيه علشان ما خليتهوش يعدي معايا لقيته بيبصلي وكأنه هياكلنى بس كنت فرحان قوى وكأنى فتحت عكا ... الاغرب انى بلاقي الواحد من دول واقف ومستنى الفرصة المناسبة علشان ينقض ويدخل مع واحد تانى بس الحمد لله انا بقيت ارخم على اى حد يعمل كدا وما برضاش ابدا ............ دول بس حكايتين من حكاوى كتير ليا فى دنيا المترو لما افتكر ابقي احكيلكوا ......

تشي

كل سنة وانت طيب يا واد يا رومانسيييييي

أحمد فهمي الرومانسيييييي صديق الدرب والكفاح والكلية وكل حاجة كل سنة وانت طيب واحنا مع بعض على طول وتلاقي يا رب اللى تقضي حياتك معاها ويوفقك مع ........ فاهمنى طبعا

وهديتك علشان منساش علشان انا ما بديش هدايا غير ع البلوج بس :P

ياللا كل سنة وانت وهى مع بعض

تشي

تاج جامد

التاج الجامد دا كان عند بيني وبينك وانا خدته واديني بجاوب عليه ومش كدا وبس لا دا انا همرره كمان
إشطات

مين اول شخص عرفت أنك بتحبه, يعني انك نفسك يبقي معاك علي طول, و نفسك تبقي مثله؟؟و ليه؟
والله السؤال دا بالذات مش فاكر له إجابة خالص قعدت كتير افكر ومش اقادر افتكر مين كان بيمثلي حاجة زى كدا !!!

أمتي أول مرة قلبك اتحرك ناحية بنت (للولاد), او ولد (للبنات)؟؟, يا ريت تحكي عن المرة ديه شوية
انا اصلا مكنتش مؤمن بالحب والحاجات دي لحد تالته اعدادى كدا ولا حاجة وفى ثانوى حبيت بنت بس مكانش حب كان إعجاب عادي يعني وراح لحال سبيله

امتي أول مرة تشوف اثنين بيحبوا بعض, و قلت هو ده الحب بجد؟
طبعا كييييييييييييييييييييكو حبيب قلبي وابن عمتى واجمل قصه حب شفتها ربنا يوفقهم يا رب

كام واحدة حبيتها في حياتك ( للولاد ), و كام واحد حبتيه في حياتك ( للبنات ), و القصد حب مش شرط بجد؟
واحدة بس ودا بجد والله مش كلام والسلام

كام شخص منهم كان نفسك تكمل معاه حياتك؟
واحدة بس مش كان نفسي دا انا كان نفسي ولسه نفسي وهيفضل نفسي تكمل مع بعض الحياة

طيب و امتي عرفت مين حبيته بجد و مين لأ؟
بنظرة سريعة فاحصة لنخاشيش قلبك من جوا هتعرف على طول مين بتحب ومين كان مجرد كلام او اعجاب او ايا كان

ايه مقاييس الحب الحقيقي بالنسبه ليك/ليكي؟
انا الاتنين يكونا بيحبوا بعض بصدق وعندهم استعداد للتضحية سب انا بقول الاتنين مينفعش واحد اه وواحد لا لازم الاتنين مع بعض

هل الحب بيدوم علي طول؟
فى نظري اه وطبعا كمان اصلا معتقدش يبقي للحياة طعم من غير حب

في نظرك, يعني ايه اتنين بيحبوا بعض بس مش بجد؟
يعني اتنين مقضينها لعب وتهريج وفسح كلام وفى الاخر احنا ما ننفعش لبعض ودمتم

للمتزوجين فقط؟انت لسة بتحب مراتك؟ طيب فاكر واحدة من اللي قبلها ولا خلاص؟
انا لسه مش متجوز بس لما اتجوز هفضل احبها على طول وهتفضل ماليه حياتى ومش هسمح لنفس افكر فى حد تانى

ايه مفهوم الغيرة عندك؟
مش عارف بالظبط بس هى فى نظري حب زايد شويتين وخوف دايم ع الحبيب وقلق من وجود اى شيء يكدر العلاقة بين اتنين

ايه مواصفقات البنت/الولد(للبنات) اللي انت نفسك تكمل حياتك معاها؟
انها تكون فاهمانى خايفة عليا مقدرة حبى ليها بتحبنى وبحبها بس كدا

و هل لاقيت ده موجود في البنت اللي بتحبها حاليا؟
اكيد وموجود قوى

و هل لاقيت ده موجود عامه؟
لا دا مينفعش يكون موجود عامة

هل الحب حرام؟, قصدي الحب يعني بنت أو ولد بتحبه و هو بيحبك و علي اتصال و علم بالحب اللي بينكم
لا طبعا مش حرام

صف نفسك كمحب في كلمه او جمله صغيرة
بحبهاااااااااااااااااااااااااااااااااااااا

التاج دا بقي مينفعش يعدي كدا من غير تمرريتين فى السريع نمرره لمين بقي مممممممممممممم
كيكو المهندس المطحون الجامد
دروبز اوف ذا اوشن
مش قادرة
احمد فهمي الواد الرومانسي
تخاريف محمد صبحي
وابو صلاح علشان ينفس فيه براحته
سيمبل جيرل وحاجاتها الملخبطة جواها
وكمان سي السيد بالمرة
وعالم الاستاذ الافتراضي قبل ما انسي

وكدا كفاية اوى المرة دي
تشي المخلص دائما

بلدنا اونطة

بقت حاجة تقرف دي والله اللى بيحصل فى الجامعات دا
كل يوم والتاني اعتقال كام طالب من جامعة ايه وطبعا اغلبهم اخوان
الكلام دا موجود فى اى حته هتلاقوه بس انا قريته فى موقع فى البلد
الخبر دا استفزنى بالذات
وفيهم اللى مقضاش العيد فى بيته وفيهم اللى اعتقل علشان الانخابات الاخيرة
وكمان اقتحم الامن جامعة عين شمس ودي طبعا مش اول مرة كرروها قبل كدا فى كذا جامعة
دي فعلا بقت حاجة تقفر هى دى مش بلدنا مش هنعرف بقي نضفها من الزبالة دي ولا أيه

قلبى مع كل طالب ربنا ابتلاه بالشرف دا
دايما هتكونا محل اعجاب منا لأنكوا بتدافعوا عن قضيتكوا ولأنكوا مش
بتتنازلوا عن حقكوا بسهولة

على فكرة انا مش اخوان بس الى بيحصل دا يضايق اى حد مهما كان انتماءه

ربنا مع كل المعتقلين على اختلاف اطيافهم

تشي

شكرا دكتور أحمد

النهاردة فعلا كان من احلى الايام فى الكلية
كان فى محاضرة فى الفترة الاخيرة للدكتور أحمد رأفت وهو أكتر دكتور بحبه فى كليتنا أصلا وبعده دكتور نبيل لاشين طبعا
المهم دكتور احمد فى وسط شرحه للبرجمه شبه الدنيا بالبرمجة
قال ان الدنيا عبارة عن شوية قرارات بتحدد مصير حياتك بتحدد هتنجح ولا هتفشل هتحقق حلمك ولا لأ هتخش الجنة ولا النار
ومش بس القرارات لا كمان عبارة عن LOOPS
لأننا بندور فى دواير لبعض الوقت علشان نسيبها ونروح دواير تانية
اربع سنين كلية انت فى دورة أو دايرة يعني
تروح الكلية تيجي من الكلية تذاكر وهكذا
تخلص وتخش فى دورة تانية تروح الشغل تيجي من الشغل
ودواير كتير وقرارات
فعلا كان تشبيه جامد ومش هعرف اوصلهولكوا بالظبط

دكتور أحمد .... شكرا

تشي

البانر دا مضايقنى

طبعا ممكن كلامى يضايق ناس منى او ياخد عنى فكرة وحشة بس دا كلامى ومقتنع بيه

البانر دا اصلا غير لائق بينا
ازاى انت او انا او اى حد اصلا يسمح انه يتف على حد مهما كان
دا مش سلوكنا
مش سلوكنا كعرب او كمسلمين
مهما كان كرهنا ليهم مش دي الطريقة المناسبة للتعبير عن كرهنا
إذا كانوا هما زبالة فأحنا ما ننزلش لمستواهم ابدا
ونفضل على طول ساميين بمبادئنا وسلوكيتنا اللى ما بتتغيرش بتغير الموقف
فى طرق كتير لتعبير عن كره إسرائيل لكن مش هي دي الطريقة المناسبة فى اعتقادي
الطريقة الاكثر تأثيرا بقي اننا نرد عليهم مش ببانر او كلمة لا بعمل وتأثير ملحوظ يحترمنا علشانة العالم بأختلاف اطيافه ونجبرهم هما كمان اننا نحترمهم
زى ما خلونا نستخدم الداونلود اكسليراتور " هو مش احسن داونلودر على فكرة وكمان انا مش ضد استخدامه لأنه اسرائيلي " احنا كمان نعمل حاجة احسن ونجبرهم يستخدموها ويحترموها مش مجرد بانر فى السايد بار

دي رؤية شخصية ممكن تخطئ او تصيب
تحياتى
تشي

شيكاجو ... اه من تلك الكتب

شيكاجو المبدع علاء الاسوانى

فى الترم التانى السنة اللى قاتت وعلى صفحات الدستور قريت شيكاجو على اجزاء واعجبت جدا بالرواية وكنت متحيز ليها اصلا قبل ما اقراها لسابق قرايتي ليعقوبيان الرواية مش الفيلم لأن الرواية اجمل كتير من الفيلم وقريت الرواية فى الدستور وعجبتني جدا رغم انتقاد البعض اسلوب الاسوانى الوصفي لكن فى اثناء مناقشتى معاهم كنت بكتشف ان الاسوانى جه ع الجرح وان اللى هما بينتقدوه اصلا موجود فى حياتهم فعلا تمثيل رائع لحياة بنعيشها وكمان لوجهه نظر امريكا فى العرب بعد احداث 11 سبتمبر
شكرا د/علاء الاسوانى
اللى خلانى اكتب البوست دا رغم انى قريت الرواية من زمان انى لسه مخلص الرواية للمرة التانية دلوقتى

للحصول على نسخة إلكترونية من الرواية من هنا

تشي انا اسف

تشي فى عزه

تشي نسيت انشر البوست بتاعك كان النت فاصل
ذكري وفاة التشي قصدي اغتياله على يد الامبريالية الامريكية زى ما كان بيحلو له القول عليها كان يوم 9 اكتوبر 1967
يعني فات اربعيييييييييييييييييين سنة
مستنين تشي جديد
يا رب ميطولش الانتظار

تشي بعد اغتياله

كل سنة وكل حد فى كل حته طيب وبألف بخير وسلامة
Happy 3aid so3'ir 2 u ur lovers ur family and ur friends
with my all best wishes
Ahmad Hima
cheeeeeez.blogspot.com

عفوا يا عيد لست ابدا سعيد على الاقل السنة دي

قبل ما انسي

بسرعة قبل ما انسي او النت يفصل
عايز اقول لحبيب قلبي وابن عمتى وواحد من اعز اصدقائي النهاردة ستة اكتوبر عيد ميلاده كل سنة وانت طيب يا محمد يا طلعت قصدي يا فيروس

تاج جديد ..... مش هنخلص ولا أيه :)

يا صباح تاجات أيه يا جماعة دا اول شهر ليا فى البلوج ودا تالت تاج

مش مهم هبدأ على طول من غير كلام كتير

امتى قلت لنفسك يا ارض انشقى وابلعينى ؟؟
مش فاكر بالظبط بس فى اغلب المواقف المحرجة

مين هو مثلك الاعلى ؟؟
قدوتى رسول الله ( ص ) ومثلي الأعلى ارنستوا جيفارا :)

هل انت راضي عن نفسك و عن حياتك و عن شغلك ( أو دراستك )؟؟
لا خالص نهائي

ايه هو احسن مسلسل كرتونى بتحبه ؟؟
توم اند جيري وكونان :)

ايه هو احلى خبر سمعته وايه أسوء خبر ؟؟
أحلى خبر مش عارف والله اصل الاخبار الحلوة بقت عمله نادره دلوقتى بس بجد مش فاكر ايه ممكن يكون احلى خبر
أسوء خبر بقي هو وفاة واحد زميلي من حوالى سنة وشوية كدا وهو فى المصيف

بتحب السفر؟؟ ليه ؟؟
اه طبعا بحبه بشوف ناس وبتعلم وحاجات كتير

أيه أكبر مشكلة قابلتك فى حياتك وازاى اتصرفت فيها ؟؟
مممممممممممممممممم اكبر مشكلة معتقدش مر عليا اللي يتقال عليه اكبر مشكلة

يا ترى أحسن صدفه حصلت في حياتك ؟؟
انى بقيت بلوجر :)

اية هى الامنية اللى نفسك تحققها ؟؟
انى ابقي بيل جيتس العربي او احسن منه كمان

بتثق فى اصحابك قد اية ؟؟
اصدقائي ... بثق فيهم جدا جدا

خانك صديق قبل كده ؟؟
اه

عملت معاة اية ؟؟
نسيته وحلفت ما اكلمه تانى او حتى اسلم عليه

كرهت حد كنت تعرفه قبل كده ؟؟
اه أنظر عاليه :)

موقف عملته و حسيت أنك ندل فيه ؟؟
بجد لا لكن بهزار على طول بـ ندّل مع اصحابي بس بهزاااااااااااااااار

ايه أكتر يوم بتحبه فى أيام الاسبوع ؟؟ وليه ؟؟
مبقتش فارقه كلها تشبه بعضها

ايه أكتر حاجه بتعجبك فى شخصيتك ؟؟ وايه اكتر حاجه بتكرهها ؟؟
اكتر حاجة بتعجبني فيا انى لما بعوز اعمل حاجة بعملها واكتر حاجة بكرهها فيا برضه انى متسرع جدا

ايه اكتر شعب بيعجبك ؟؟ واكتر شعب مش بيعجبك ؟؟
اكتر شعب بيعجبنى الفرنسيين واكتر شعب مش بيعجبني المصريييييييييييييييييييييييييييييين

اكترحاجة بتحبها فى حياتك عامة ؟؟
انى موجود فيها

واكتر حاجة بتكرها ؟؟
ان حد عزيز عليا يغيب عنها

وايه المكان اللى بتحب تروحه على طول لما تكون زهقان؟؟
اى مكان فاضي مفيهوش ناس وفيه إضاءة خفيفة ويا سلام لو حته ع الكورنيش

ايه هى رياضتك المفضلة؟؟
كرة القدم طبعا بس نفسي اجرب التزحلق على المياة جامدة اللعبة دي

أيه هي نظرتك للدنيا؟؟
مش عارف بالظبط يعني بس بتوقع الاسوء دايما

أيه أكتر اغنية بتحبها وبتهديها لمين ؟؟
منير يا شمس ( اسمها من حر مالى برضه ) وبهديها لكل الناس

التاج دا هتمرره لمين " وش شيطان بيضحك " !!!؟؟
ممممممممممممممممممم اخيرا جالى تاج امرره " نفس الوش اللى فى السؤال "
مش قادرة .......... تخاريف محمد شهبي ............... أحمد المصري .......... الكاتب الكبييييييييييير اسامة يوسف ........... ايهاب على ودنياه ................ وتنفيس ابو صلاح كمان بالمرة .................. اه صحيح ومصطفى فتحي اللى ما بيجاوبش على تاجات خالص :)

الحمد لله خلصنا

أنه ................ الموت

لو كنت فرحان او مبتسم او متفائل فبلاش تقري البوست دا احسن

دائما وأبدا بحب اكتب عنه رغم ان دا غريب فأنى بحب اكتب عنه على طول .
على طول كل لما اكون مضايق زى ما أنا دلوقتى أقعد أفكر هيحصل ايه لو حد مات وحسب حالتى النفسية باختار الشخص دا غالبا بيكون أنا أو حد من أصدقائي قريب ليا قوى وأقعد بقي أتخيل لو أنى مت مين هيزعل عليا ... أصلا حد هيهتم بيا ولا خلاص كأنه لم يكن يوم ما أعتقد دا أسوء موقف ممكن تتحط فيه لو أنك مت والناس كلها نسيتك فتره حزن وبعدين نسيتك وذهبت من حياتهم كدا من غير اى ذكري من غير اى أثر يفتكروك بيه هيبقي شعور فعلا يضايق وتقعد بقي تفنط اصحابك دا شهر بالكتير قوى وينسانى ودا كان صاحبي قوى ممكن بفتكرنى لسنه كاملة ودا ودا ودا كتير بقي وتلاقي انك اكتشفت حاجات غريبة جدا عن الناس اللى تعرفهم وبدأت تعيد التفكير وكمان بسأل نفسي هل هزعل عليا لما أموت !!!! مش عارف السؤال الوحيد اللى ما بلاقيش له أجابة هو دا ...... هل هزعل هلى نفسي لما اموت وهفتكرنى قد أيه قبل لما ارجع حياتى وأنسانى !!!؟؟؟

دا تفكير بينتابني ساعات لكن ساعات تانى بفكر بقي لو حد تانى مات وغالبا بيكون حد قريب منى جدا وقد ايه هكون حزين وقد ايه هضايق واد أيه مش هعرف أكمل من غيره ...... معقول مش هشوفه تانى ...... فى الوقت دا بالذات بكتشف حاجات كتير كانت غايبه عنى قد أيه الناس دي فيها حاجات كتير اكتر ما أنا اتصور حاجات كتير حلوة كانت غايبه عنى بس لما بتخيل كدا قصدي لما فعلا بعيش كدا وبعيشه كأنه واقع حصل بقعد افتكر الحاجات الحلوة اللى حصلت بينا وقد ايه بننسي الحاجات الكويسه علشان حاجات تافهه .
بس كدا كفاية علشان محدش يضايق منى او حتى يجيله أكتئاب
سلام