احنا من غير نقابة :((

أحنا دول هما احنا طلبة حاسبات ومعلومات مصر والواحد طالع عين ........... بلاش طالع عينه واربع سنين ودراسة ملهاش لازمة وملهاش علاقة بسوق العمل ودنيا بايظة ومستحملين دا كله وفى الاخر ملناش نقابة اى والله مشفتوش كلية كانت بتاخد من 98 فى المية ودلوقتى ما بتنزلش عن 92 فى المية المهندسين بيقولوا قال ايه احنا مش قد المقام ومش خمس سنين وعايزين يخلونا قال ايه اخصائي حاسب لييييييييييييييييييييه على رأي أحمد حلمي حمرا الطاحونة حمرا بعد دا كله وفى الاخر تقولي اخصائي حسبي الله " :(( "
والمصيبة بقي لما أقعد مع حد من زمايلي ولا قرايبي اللى فى هندسة وتقطيم بقي وتريقة وباللى من غير كارنية نقابه " X-( "
وانا هقول ايه يعني والاستفزاز شغال ومفيش بقي تقولهم هو فى زى الكومبيوتر ومجال الكومبيوتر وشغل الكومبيوتر وبرمجه وجافا وسي وهنلاقي شغل وانتوا هتقعدوا ع الرصيف زى كل خريجي هندسة ولا يأثر معاهم على الاقل لينا نقابة يا عم ربنا ياخد دي نقابة والواحد دمه يتحرق بقي يروح متخانق معاهم ويعمل زعلان علشان يسكتوا بس مين يا ابنى دا بتوع المعاهد ليهم نقابات بتوع حقوق ليهم نقابة دا حتى خدمة اجتماعيه ليهم نقابه هههههههههههههه ":(( "
مقولكش بقي ع الاستفزاز لما يعجبهم ويستلمونى طول اليوم ببقي عايز حاجة من اتنين يا انتحر يا اقتلهم ولان الكترة تغلب الشجاعة بيزيد الاحتمال الاول ............
عموما مش مهم احنا هنثبت نفسنا من غير نقابة " :-< " لا مش هنثبت احنا خلاص اثبتنا نفسنا ولكم فى البنات اللى خدوا التالت ع العالم خير مثال احنا مش محتاجين نقابة لينا وبس لا كمان علشان لما نخرج بره مصر يبقي لينا مسمى وظيفي محترم عارفين بقي لو قلت البقين اللى فوق دول وهما قاعدين يتريقوا يبقى ضمنت انى هنتحر وعليه مليش متنفس غير هنا علشان اخرج فيه حزنى واسفى على حالنا وعمار يا مصر

كنت بدور على حاجة فى درج المكتب لقيت ورقه كنت كاتب فيها زمان جزء من مقالة للعقاد وكنت مؤمن انها صح
دلوقتى انا بعيد التفكر .... هل فعلا الكلام دا صح
اه نسيت هكتبلكوا الكلام ايه

A لماذا تخلف المسلمون A

" - لماذا يضعف المؤمنون ؟ يضعفون لأنهم أهملوا آداب الدين التى نهضوا بيها فى صدر الإسلام
- ولماذا أهملوا آداب الدين ؟ لأنهم جهلوا لبابه وتمسكوا بالقشور
- ولماذا جهلوا ؟ لأنهم فقدوا الهمة واستكانوا إلى الخور والتسليم

ولك ان تتابع السلسلة عكسا كما تابعتها طردا ..... فتقول أنهم فقدوا الهمة لأنهم جهلوا وانهم جهلوا لآنهم أهملوا آداب الدين وأنهم اهملوا آداب الدين لأنهم ضعفوا "

من مقاله للعقاد

دا بالظبط شكل المقالة زى ما انا كاتبها فى الورقة بس مش عارف ليه مبقيتش مصدق ان دا هو سبب ضعفنا كمسلمين بالتأكيد الحكاية أكبر من كدا ................. دي بس كانت الورقة

تاج جالى من حيث لا أدري

يا سبحان الله قلت ادخل ابص عند تانى واحدة بتحب أضحك للدنيا بعدي لقيتها مجاوبه على تاج قلت وماله تاج تاج لما نقرا ليقت كلام جميل كلام معقول كلام حلو اوى بس فجأة كدا وفى الاخر لقيت اسمى مكتوب وقال ايه خير اللهم اجعله خير التاج متمرر ليا انا .... لمين ياعم اه والله ليه ياللا مش مهم استعنا ع الشقي بالله

لو قالولك اختارعصر من عصور مصر عشان تعيش فيه تختاراى عصر وفى عهد اى حاكم واشمعنى؟
هروح عصر سيف الدين قطز وليه بقي علشان اشوف القصة بتاعه تانية ثانوى دي حقيقة ولا المؤلف بيهيس

اول اولوية فى حياتك عيلتك ولا شغلك ولا اصحابك؟
أصحابي وبعدين شغلي وبعدين العيلة :)

ايه اكتر حاجة بتحبها فى رمضان؟
ان اوقات المحاضرات صغير لا لا بهزر اكتر حاجة انى بفطر مع العيلة اصلي مش باكل معاهم ابدا على طول لوحدى وانا قاعد ع النت لسه هقوم بقي وبتاع

اوصف ليا اجمل فطار ممكن تفطره؟
مع أصحابي كدا ومش مهم فين ولا بناكل ايه بس مع بعض كلنا

لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟
لو مجموعة دي يعني شوية صغيرين كدا ع القد طبعا هبقي عادل لو بقي شعب طبعا معتقدش ابدا انى هبقي عادل لانى مش هعرف اصلا احكم على نفسي اذا كنت عادل ولا لأ علشان كدا ما بحبش ابقي حاكم اللى مش قد حاجة ميعملهاش

اللى بيبوظ الحكام ..نفسهم ولا الشعب ولا الحاشية المقربة؟؟
التلاتة بس بالترتيب كدا الحاشية 60%
نفسهم 30%
الشعب 10%

مين اكتر اعلامى مصرى بتحترمه؟؟
هيكل وعمرو اديب

قريت ديوان عمر مصطفى صاحب بلوج تجربة" اسباب وجيهة للفرح" عن دار ملامح ولا لسه؟؟
للأسف لسه .. عرفنى اجيبه منين وانا اقراه

لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟
انا المفروض بدرس حاسبات ومعلومات يعني المفروض مبرمج مستقبلا بس لو مكنتش كدا كنت احب فعلا اكون صحفي او كاتب او اعلامي

ايه تانى بلد تتمنى تعيش فيها بعد مصر؟؟
باريس وبعدين كندا

اوصف ليا ترتيبات اجمل فرح ممكن تحضره؟؟
فرح ابن عمتى واعز اصدقائي وترتيباته بقي انه بس يبسطه ويخليه فرحان ودى تخليه اجمل فرح احضره


بتراعى كلام الناس والقيل والقال؟ لو اه او لو لا قولى ليه؟
مش دايما لو حاجة بتتعلق بيا لوحدى ما بيهمنيش كلام الناس لكن لو بتتعلق بيا وباى حد تانى براعيه علشان الامر ميخصنيش لوحدي ويمكن كمان براعي كلام الناس فى انطباعهم الاول عنى بس

صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟
مش متخيل حياتى بدون كومبيوتر اصلا ما بالك من غير كومبيوتر وموبايل وكاميرا وكمان حمام لا يا عم دا انا لو رجعت لعصر قطز زى ما قلت فوق هاخد معايا لاب توب

السعادة هى؟؟
معرفلهاش تعريف او طريق عام بس بالنسبة ليا لما اشوف حد من زمايلي مبسوط

عندك امل ؟ اسبابك ؟
يعني إلى حد ما والسبب انى بشوف ناس عندها امل بيدونى امل :)

لما تحب تهرب من كل شىء بتروح فين؟؟

بتمشي فى اى حته مفيهاش نور او ضوء خفيف تقريبا وتكون فاضية ويا سلام لو على حته فاضية ع الكورنيش ولو فى اسكندرية يبقي على البحر بالليل

امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟
لسه ما قلتش :)

لما بتعمل عمل خيرى بيكون ايه هو دافعك الاول؟؟
انى اشوف نشوة الفرح فى عنين اللى اتعمله العمل دا بيفرحنى جدا الشعور دا

بتشرب سجاير؟لو الاجابة اه ايه شعورك لو شفت ست بتشرب سجاير وليه؟
لا بس هفترض انى جاوبت بأه اعتقد هيكون نفس شعورى لو واحد بيشرب سجاير انا ما بتفرقش معايا ذكر ومؤنث خالص الغلط غلط ولو بشرب سجاير كان هيبقي عادي لو شفت واحدة بتشرب سجاير


بتعرف ايدك اليمين من الشمال ازاى؟
عادي بعرفهم بس على شرط وحيد مكونش ماشي لأنى لو ماشي لازم اقف اركز علشان اعرفهم " غريبة صح :) "

ايه اكتر اله موسيقية بتحبها؟
الناى

فى رأيك ليه الذوق والنخوة اتعدموا؟
مين قال انعدموا يكونوا انعدموا لما احنا ميكونش عندنا ذوق ونخوة لما كل واحد يفضل متمسك بنخوته وذوقه مش ابدا هينعدموا

ايه الحاجة اللى لو حصلتلك تبقى سعيد قوى؟
1- انى احقق هدفي الاسمى واللى تحت منه على طول
2- انى اتجوز البنت اللي بحبها
3- انى ما اشوفش حد حزين ابدا

تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟
ولا واحدة منهم بس لو اصريت هتبقي الفلوس

البحر ولا النيل؟؟؟
البحر " وعلى فكرة يا تانى اكتر واحدة بتحب اضحك فى الدنيا :)) برضه خد واحد من اعز اصدقائي من سنتين "

مركب ولا طيارة؟
مركب وبحر ومنير وتحلى القعدة

عاقل ولا مجنون؟
مجنون وليا الشرف

تقرا كتاب ولا تتفرج على فيلم؟
طبعا كتاب واساسا انا بطلت تلفزيون من زمان ماعدا لو فيلم هيت لازم اشوفه دا الباتشينوا ودي نيرو سوا في فيلم واحد

بتمرر التاج لمين؟؟!!!!
مش لأى حد معلش بقي المرة الجاية هدبس ناس كتير

أخيييييييييييييييييييييييييييييييييييرا الحمد لله نمررلك تاجات قريب ان شاء الله

كملت ... ما دا اللى ناقص

مش مكفيهم كمية الخطوط الحمرا اللى فى التلفزيون الزفت اللى محدش بقي يتفرج عليه غير فى رمضان علشان بكار وخلاص شالوا بكار يبقي مش هنتفرج عليه خالص " أحسن " لا كمان بقي معجبهمش عمرو اديب " اكتر زملكاوى بحبه بعد ابن عمتى :) "
ومكفهامش انهم منعوا الحلقة بتاعته مع لميس الحديدى لا كمان قال بيحطوا صفارة " تييييييييييييت " فى حلقة الشيخ خالد الجندي لما يجيب سيرته " =)) "
وكمان عايزين يقفلوا الاوربت علشان القاهرة اليوم " X-( "
ودا كله علشان ناقش ملشكة العيش " قال يعني جت عليه " من كتر ما احنا لاقيين العيش زعلانين انه بيتكلم عليه ويا حرام البلد مليانة عيش واحنا اللى يدب فى عنينا رصاصة وما بعجبناش العجب عاملين زى امبراطورة فرنسا لما بيقولولها الشعب مش لاقي العيش قالتلهم وما بيكلوش جاتوه ليه خلاص لقينا الحل كلوا جاتوه يا شعب " :-< "

اقرا الحادثة قصدي الخبر فى المصري اليوم من هنا

انا اجيب

دى شوية أسئلة واخدها من دماغ محمد حمدي وقلت اجاوب عليها علشان عجبتني

هيحصل ايه لاميلك لما تموت؟
قررت ادي الباس لانسان قريب منى جدا اهو علشان الناس تعرف انى مت ويبطلوا يبعتولى على الفاضي

اديت الباس ورد لحد قبل كده؟وايه صبيعة علاقتك بيه؟

اه اديته من قريب وطبيعة علاقتى كاتم اسراري :) بس كدا

اسمك المشهور بيه وسط صحابك؟

جيفارا

شخصيتك نوعها ايه؟

بحس انى سودوى زيادة عن اللزوم بس انا حاببنى كدا

السفر بالنسبه لك؟
انى اروح المحروقة الكلية بتاعتى او اسكندرية بس نفسي اروح حتت غريبة

وقت فراغك بتعمل فيه ايه؟

بقعد اقرا لانى بحب القراية جدا

المود بتاعك؟

غالبا بيبقي لونة اسود بس لو بلعب فيفا مع اصحابي يبقي مهييييييييييييس

الاكله المفضله؟

مش حاجة معينة بس البطاطس واى حلويات

صفات اخدتها من بابا؟

انه لما بيقرر يعمل حاجة بيعملها

الصفات اللى اخدتها من ماما؟

الطيبة

اكتر ست حاجات بكرها؟
الكدب
الخيانة
صديق السوء
مصطفي كامل
حكاية ان اللى ما يحضرش اربع محضرات ما يدخلش الامتحان عندنا فى الكلية
وزراة الداخلية

اكتر ست حاجات بحبها؟
الشيكولاتة
اللب
القراية
النت
البحر واسكندرية
القراية

الشغل بالنسبه لك؟

لسه ما اشتغلتش بس بحب الشغل جدا

الانترنت بالنسبه لك؟

إدمان

اختبار ادمان التدوين

مجربتوش بس انا لسه جديد

س1 اكتر موقف صعب مر عليك فى حياتك؟

وفاة واحد زميلي كان اكبر منى بسنة واحدة وكنا قبلها بفترة بنهرج ونهزر وعادي جدا

س2 اكتر ذكرى مش بتقدر تنسها ابدا وتقريبا عايشه معاك؟

المذكورة عاليه

س3لو معاك باقة ورد هتهديها لمين وليه؟

لمحمد منير علشان بحب مزيكته وكلامه وكل حاجة

س 4 لو قدامك حيطه فاضيه وتباشير هتكتب ايه وليه؟

هكتب البيت بتاع بيرم التونسي : بلدنا زى الرصيف وسخ وعايز يتكنس ..... فى ناس بتعرق ع الرغيق وناس بتعرق م التنس

ومش محتاجه ليه اعتقد

س 5اكتر شخصيه اثرت على حياتك؟

مفيش حتى الان الشخصية اللى ليها تأثير كبير يذكر

س6 لحظه حسيت فيها ان حياتك بتتغير؟

من حوالى سنة وشوية بس مش مهم ليه

بس كدا سلام مؤقت لحد المرة الجاية

فى العشق والهوى

الفيلم دا اتفرجت عليه من زمان بس امبارح فكرت فيه تانى وحطيت نفسي مكان كل واحد من ابطال الفيلم وقلت اشوف ممكن اتصرف ازاى ................. طبعا الفيلم مليان علاقات داخلة فى بعضها ودنيا غريبه وحب وفرح واختلاف فراق وعياط ويمكن علشان كدا حبيت الفيلم المهم كل بطل بقي لو مكانه كنا هنعمل ايه .................؟؟
أحمد السقا لو انى مكانه فى اول مشكلة قابلته انا شايف انه غلطان والمفروض مكانش يسيب منى زكى بس هل بقي لو انا مكانه هعمل ايه اعتقد بالظبط زى اللى عمله رغم انه غلط بس لو اى حد اتحط مكانه اعتقد انه هايتصرف نفس التصرف بس هاختلف معاه فى انه اتجوز بشري لانه حاول ينسي منى فوافق بدون تردد على انه يتجوز بشري وبالنسبة لجوازه من منه شلبي اعتقد انى كنت هاتصرف نفس التصرف .
لو كنت مكان منى زكى بقي الموقف هيبقي اصعب مينفعش تتخلص من اختها وكمان مينفعش نسيبها وتمشي لانها مصدر الدخل الوحيد ليها وكمان ما ينفعش تصارح السقا هتقوله ايه يعني بس مش عارف هى كانت متخيله انه مش هيعرف ابدا مثلا بس هى كانت فعلا فى موقف صعب جدا ومافيهوش اى خيارات تختار منها كان كل شيء ليه مخرج واحد وواحد بس وهى لازم تختاره .
اللى كان غريب بقي بشري لأنى شايف انها مكانتش بتحب السقا بقدر ماكانت متبرمجه على حبه يعني هما ومن صغرهم كان بيتقال انهم بيحبوا بعض ولبعض يعني هى كبرت وعندها يقين انها بتحبه وهو بيحيها فالحب دا ما اتبناش بينهم لا الاهل هما اللى بنوه لكن السقا اتخلص منه لكن هى ما اتخلصتش وفضلت متخيله العلاقة الرائعة بينهم رغم انها مكانتش حقيقة رغم انها اخلصت فى حبيها بس كانت علاقة من طرف واحد .
طارق لطفي اعتقد انه اتصرف صح تمام .
منه شلبى برضه كان تصرفها صح معتقدش انها غلطت غير انها خبت من الاول على الناس جوازها من السقا لكن انا شايف انها كانت اجمل وانجح علاقة فى الفيلم .
بس كدا بس نفسي اتفرج بقي على تيمور وشفيقة علشان ملحقتوش فى السينما :)

ليه بلوج ؟؟؟؟

كانت فكرة من زمان من حوالى اكتر من سنة او اتنين بس كل مرة اقول لو عملته مش هاقدر اتابعه كويس ومش هقدر اعمل بوست بشكل دوري المهم ناس شجعتنى بس برضه متردد لغاية لما اتخنقت من المنتديات والمشرفين اللى بيعيشوا وبيشيلوا المواضيع اللي مش على مزاجهم قلت والله ما انا داخلها تانى وانا بقي هعمل بلوج وهكتب زى ما انا عايز وانا الرقيب على نفسي وهكتب اللى فى دماغى واللى انا راضي عنه وبس :)